Ако гордоста има второ име

Ако гордоста има второ име

Би го носела твоето.

Не знам дали би дозволил

На левиот образ да носиш траги

Еве, не знам

не мора да е левиот

Нека биде десниот.

Не знам дали би дозволил

На телото да носиш траги.

Траги од еден миг

Што допрва треба да дојде

А велат, мигот не се пропушта

Тука е и сега е.

Оти пропуштиш ли миг

Како цел еден живот да си пропуштил.

А кој има живот за фрлање?

Впрочем, ти тоа најдобро го знаеш.

А мигот скриен копнеж ли е

А мигот скриена страст ли е

А мигот во друг живот ли ќе е?

Ако гордоста има второ име

Би го носела твоето.

Јас ќе се молам за тебе

Јас ќе се молам за тебе.

Кому, ни сама не знам.

Слушам чекори кои движат

А денот измерен е со мисли

Врвулица од мисли

Една мисла еден збор

Една мисла еден ден

Една мисла секој ден

Некои почетоци некогаш доцнат

Или го згрешиле времето

Деценијата

Можеби и векот

Понекогаш сум само тивка, а викам

Живот во слики

Кажуваме зборови на кои не се сеќаваме

Се плашиме да се погледнеме во огледало

Се плашиме од скршено огледало

Јас ќе се молам за тебе

А ти само љуби ме